Ав, çăлтăр ÿкрĕ умăмрах ][ Георгий Ефимов / Keorkĭ Jeffimăf

Ав, çăлтăр ÿкрĕ умăмрах,
Хăй хыççăн çутă йĕр хăварчĕ.
Шеллерĕм эпĕ çăлтăра, —
Ун хыççăн хамăн ÿкес марччĕ.

Çăлтăр ÿксессĕн, вăл сÿнсессĕн
Пĕр чун каять тет çĕр çинчен.
Çавăнпала калатăн эсĕ:
«Ман çăлтăр тÿпере! Ӳкмен».

Вара чун лăпланать. Хаваслăх
Ӑша тулмашкăн тапратать.
Пурнакан çĕр, чăнах та, аслăн,
Вĕç-хĕрсĕр пулнăн туйăнать.

Сăн-пит çинче йăл-йăлтăр кулă
Ачашшăн выляса илет.
Çынна курсан: «Телейлĕ пулăр!»
Тесе чунтан калас килет.

Мĕн пуласса пĕлекен майлă
Пăхатăн эсĕ тавралла.
Ман йăмăксем те уссе кайнă,
Хĕр шутне кĕчĕç пулмалла.

Ма çăлтăр ÿкрĕ туперен!
Тÿпе, тен, хĕсĕк пулнă уншăн!
Ман вăранасчĕ ирсерен
Ӗçпе хĕрен кĕрлевлĕ куншăн...

Чăваш сăмахлăхĕн вăрманĕ ][ Георгий Ефимов / Keorkĭ Jeffimăf

Чăваш сăмахлăхĕн вăрманĕ
Ялан та чĕрĕ, ешерет:
Унта кĕрсен, чуну сан канĕ,
Вăй пухĕ шанчăксăр чĕре.

Чăваш сăмахлăхĕн уй-хирĕ
Сап-сар пучахĕпе вылять:
Кашни пĕрчин хĕвеллĕ ирĕ
Туптавлă куншăн вăй пухать.

Чăваш сăмахлăхĕн çыранĕ
Чечексемпе çуллен пуян:
Чечек çине пыл хурчĕ анĕ
Чăн пыл пухас тесе ялан.

Чăваш сăмахлăхĕн çăлкуçĕ
Хĕр юрринче те ват çынра:
Йăхран йăха тăванлăн куçĕ, —
Чĕлхем шăнкрав пек янăрать.
Чăваш сăмахлăхĕ — вăл Атăл,
Ун хăй йĕрки те хăй екки,
Çавăнпала савса калатăп:
«Çуках тăван чĕлхе пекки!»

Янравлă сăвăсен ытамĕнче ][ Георгий Ефимов / Keorkĭ Jeffimăf

Янравлă сăвăсен ытамĕнче
Туссемпеле тăванланса ларатпăр.
Салхуллă та хаваслă çут тĕнче
Куç умĕнчех Уçăлнине куратпăр.

Чăнах та, сăвăсем вуланă май
Чун-чĕресем ырăланса пыраççĕ.
Хурлăхĕсем пулсассăн та нумай,
Куçăмăрсем телей енне пăхаççĕ.

Юмахри пек асамлă сар хĕрсем
Çич пĕлĕт тÿпине çитме чĕнеççĕ,
Сĕрен кĕперĕ тĕслĕ кĕписем
Кăчăк туртса та илĕртсе çиçеççĕ.

Сăвăç ача пек ĕненет йăлтах,
Суйма пултараймасть вăл нихăçан та.
Кĕç тытĕ ылтăн пулă Атăлта,
Çавах кун-çулĕ унăн пулмĕ янтă.

Хăй паккусне те хăй каçалăкне
Вăл тĕплĕн çулĕ, тĕплĕн пухса кĕртĕ,
Тăрсассăн тăван халăхĕ умне
Чысне те упрĕ, хăй ятне те çĕртмĕ.

Чăваш сăмахĕ унăн çÿпçинче
Пур ылтăн-кĕмĕлтен те хаклă питĕ.
Салхуллă та илемлĕ çут тĕнчен
Хуйхи-суйхи тухать ун чĕри витĕр.

Чечек çураççĕ чиесем ][ Георгий Ефимов / Keorkĭ Jeffimăf

Чечек çураççĕ чиесем,
Кÿкен те шап-шурах ларать.
Çĕн уйăх — тÿпери илем —
Тĕтре ăшне путать.

Шап-шур сеске пуç тăррине
Ӳкет те шуратать.
Çур каçĕ, тен, кĕркуннене
Асра тытма хушать.

Анчах та шурă çеçкене
Çил вĕçтерсе ярать.
Мĕн тăвăн! — Çÿçĕн кĕмĕлне
Кун-çул сыхлать, упрать.

Этемĕн те хăйне виçе —
Чечек çурать... кун-çул тăвать...
Малтан вăл ĕмĕтпе вĕçет,
Пуласлăхне курса çиçет, —
Кайран... туяланать.

Чечек çураççĕ чиесем.
Юлать-и улмуççи!
«Çĕре ялан илем кĕртсем», —
Пăшăлтатать ăш çил.

Пĕлменнине пĕлме чĕнет ][ Георгий Ефимов / Keorkĭ Jeffimăf

Пĕлменнине пĕлме чĕнет
Ман шухăшăм — çунатлă кайăк:
Таçта инçе çыран енне
Ӗмĕтпеле тухса эп кайăп.

Çич пĕлĕт тÿпине хăпарăп,
Хуркайăк çупĕ тăрăх утăп.
Уйăх çинче те йĕр хăварăп,
Асамлă уйăх чулне тупăп.

Куçсем ман сăлтăр евĕр вылĕç:
Çĕр сийĕнчн пулăмсене
Асăрхаса ăша йăлт хывĕç,
Йăлт курăп çын пурăнăсне.

Ав, çуралать ача, унтах
Ватти каять леш тĕнчене.
Тепей те, хурлăх та утать, —
Пĕлме пуçлан пĕлменнине.

Курма пуçлатăн тĕтре витĕр
Ӗçлекен çыннăн кун-çулне.
Çĕр
Вир пĕрчи пек пĕчĕк питĕ,
Çавах ан хуçтăр тĕнĕлне.

Куратăп: силпеле хумсем
Ватассĕ чуллă сырана.
Акать, вырать ĕçчен этем, —
Вăл малалла çеç талпăнать.

Пĕлменнине пĕлме чĕнет
Хăй канăçне çухатнă пуçăм.
Çĕн ĕмĕр алăк хăлăпне
Тытса туссемшĕн ярах уçăп.

Шурăмпуҫ вальсĕ ][ Георгий Ефимов / Keorkĭ Jeffimăf

Савнăç та хурлăх йăлтах иртсе кайрĕ:
Сывă пул, сывă пул,
Тăван шкул.
Чÿрече умĕнче вĕрене пусне тайрĕ:
«Анăçтăр сирĕн умри ирĕк çул».

Укăлча патнелле
Йышпала çул тытатпăр,
Кашнин — хăй телейĕ умра.
Шурăмпус хăпарать,
Эпир уççăн куратпăр:
Ав хĕвел те тухать — шевли йăлтăрать.

Хĕвеле кĕтме ырă,
Ун шевли çуттăн-çуттăн
Тăванла туйăмпа
Пит çинче вăй вылять.
Ман юратнă пике
Пуçласа питĕ тутлăн
Юлташсем умĕнчех
Ыталать, чуптăвать.

Чечексем, чечексем —
Тюльпанпа çут нарцисĕ
Ачаш шăршăпа ипĕртеççĕ чуна.
Çамрăкла пуçланать
Каччăпа сар хĕр чысĕ,
Пуçсем кĕмĕлленсен те
Упрасчĕ ăна.

Шурăмпуç çĕкленсен
Кăмăлсем те тулаççĕ,
Шурăмпуç çутипе
Çутă кун пуçланать.
Ав, пулас ĕçченсем
Алла-аллăн утаççĕ,
Пире шкул пурнăçа çул уçать.