Улшăнанçи пулать те уйăх... ][ Marină Kar'akĕnă / Марина Карягина

Улшăнанçи пулать те уйăх —
Каллех тулса çавраланать:
Çав ĕмĕрех — пуçра — çав хуйăх:
Паян ăнман — ыран ăнать!

Таçта шăтса ÿсни! /Çи! тейĕн:
Çеçке марах халь тин — улма/
Хум юххипе ăçта çитейĕн?..
— Мăн тинĕс йывăçĕ пулма!

Асри ÿкерчĕк е пуласлăх,
Е çак самант — ик куç тулли:
Эп хамшăн хам тĕнче пек аслă
/Тĕнчишĕн хамăр — йыт кулли.../

Пăтрав килсе пăтрантарать-и,
Утрав шырать-и пан улми... —
Пит ан хĕрхен: этем ăрачĕ
Пĕтсех пĕтмен-ха ним юлми.

Üt-pĕvĕm — pĕlĕt hăjmincen... ][ Марина Карягина / Marină Kar'akĕnă

Üt-pĕvĕm — pĕlĕt hăjmincen,
Kuş tarănăshĕ — tinĕs:
Humsem cula ta ishĕş —
An tĕlĕn jĕp te văjlincen,
An tĕlĕn şip te văjlincen —
Tăva arkatĕ şumăr.
/Jeple cătajĕ cunăr:
Cunsem te — şumăr tĕncincen/.
Cunsem te — humăn tĕncincen
/Cuna unran şĕlenĕ! /
Kam tüpene şillenĕ
Shăp şurşĕr-kăntăr tĕlĕnce?
Shăp şur şĕr-kăntăr tĕlĕnce
Shăp pul ta... sassăr asăn.
Samant păhat’ hărassăn:
Ep — şip-şinşe, ep — jĕp şince.
Ep — jĕp şince, ep — şip şince,
Ep mĕn purrishĕn — şĕvĕ.
Yran tata mĕn şăvĕ? —
Şĕvvü kajminccĕ, şut tĕnce!

Тÿпе! ][ Марина Карягина / Marină Kar'akĕnă

Тÿпе!
Тупа пур ман:
çăла сурман,
шăла шартса шăлан çимен,
çÿлтен ÿкмен,
çÿле сикмен
/вĕçме килмен!/ —
пÿкле вилмен:
шăрт май шăлатăп шăпана.
Шăп ана.
Тÿпе ăна —
хуппи пек —
шăп кăна.
Анчах... сăна —
/пăхма хăрамалла сăнна!/ —
пуçу çине ÿкет ту пек —
тÿпе.