Шăплăх минучĕ ][ Петĕр Ялкир / Petĕr Jalkir

Анлă Атăл çинче,
Сталинград патĕнче,
Ÿкме тиврĕ маттур воинсен.
Ахальтен–им вара
Чуппине чакарать
Вичкĕн çил те вăрçа асилсен?

Вутлă Курск пĕккинче,
Ленинград ункинче
Хупăнман–им телейшĕн куçсем?
Вĕсене асăнса,
Тинкерсе анăçа,
Шăпланаççĕ хавас шăпчăксем.

Ешерен уй–хирсем
Ан таптанччăр тесе,
Хăшĕ хучĕ пуçне Берлинта.
Вĕсемпе пĕр пулса,
Янрататпăр сасса:
Чĕрттерместпĕр хăрушă вута!

Шăплăх минучĕ,
Шăплăх минучĕ.
Паттăрсене асăнатпăр паян.
Шăплăх минучĕ,
Шăплăх минучĕ.
Вăрçă шавне вăл хуплатăр ялан!

Эльмен айăпĕ ][ Петĕр Ялкир / Petĕr Jalkir

Чăвашсемшĕн тăрăшнă пекрех
Вăл хăйне ялан кăтартнă.
"Автономи тăвăпăр" тесех
Хăть ăçта сăмах çаптарнă.

Етĕрне чăвашĕ пулнăран
Тăрăшнă хăй вирьялсемшĕн.
Чĕмпĕре столица тăвасран
Çав тери хăранă мĕскĕн.

Савандеев — Анатсен асли —
Элмене пит шиклентернĕ.
Чĕмпĕре туман чăваш хули,
Ленин сĕннине сивленĕ.

Илнĕ кĕпĕрне хулисене:
Пушкăрт Ĕпхĕве ал панă,
Тутар тытнă Хусан элемне, —
Уншăн савăнса ташланă.

Пире лекнĕ уес хули çех.
Эпĕр пит нумай çухатнă.
Чăвашсен çурри куçкĕретех
Пирĕнтен уйрăлса кайнă.

Вырăса е тутара тухса
Хăш чăваш пире шар кÿнĕ.
Элмене хăть халĕ ылханса
Лăплантăр-и чăваш чунĕ.