C. Есенин майлă
Ыран ир вăратсамччĕ, аннеçĕм,
Эс мана шурăмпуç тĕлнелле.
Аякран пур хыпар çыру вĕççĕн,
Манăн хаклă хăнам килмелле.
Ир ирех сывлăмпа çитĕ тусăм
Шăплăхра шăпчăксем вăрансан.
Ытамра сирĕлĕ пирĕн тунсăх,
Туххăмах кайĕ кун çуталса!
Тĕмсĕлсе кĕтнĕрен кăмăл тулĕ,
Шăнăçаймĕ хаваслăх пÿртре.
Чечекпе чÿхенен улăх çулĕ
Хырлăха ертсе кайĕ пире.
Темиçе çул пулман уявра эп,
Унчченхи хĕрĕве çĕнетсе,
Купăса пĕрпĕхcех тăсса ярăп —
Шăранса йĕрĕç йĕс чĕлĕхсем!
Çак сăваплă çĕрте эп кун курнă,
Уй-хир илнĕ ынат ытамне.
Ах, шăпаçăм, ан кур тек хĕн-хурлăх,
Ан аса ил, аннем, иртнине.
Çапах пур ман эс панă пĕр пиллĕх:
"Несĕле эс упра, ят-чысна".
Сан пата час килеймĕп, тен, ÿлĕм
Эп, аннеçĕм, юри асăнса.
Эппин, хамăрăн хаклă хăнашăн
Кĕрекемĕр тулли пултăрах.
Çĕр çинче çĕнĕ юрă хывмашкăн
Эпир тивĕç манми туслăхра!
