Мехел тени мĕскер тени пулать?
Ыйтсамăр çумăр пĕлĕчĕсенчен:
Мĕн-ма вĕсем кăвак уярпалла
Юхаççĕ çăвăнмасăр тахçанччен?
Мехел çитмен.
Мехел тени мĕскер тени тăван?
Ыйтсамăр кайăк хур ушкăнĕнчен:
Мĕскершĕн вăл пайтах шурамăкран
Вĕçсе иртет, анмасть картипелен?
Мехел çитмен.
Мехел тени мĕскер тени иккен?
Ыйтсамăр пахчари улмуççирен:
Ма ун çеçки чăмăртанса çитсен
Тепре çĕр каçатех çурăличчен?
Мехел çитмен.
Апла мехел тени мĕскер ĕнтĕ?
Ыйтсамăр сĕрме купăс каччинчен:
Мĕн-ма патнех-патнех çитсессĕн те
Пусмасть вăл хĕлĕхне пỹрнипелен?
Мехел çитмен.
Мехел çитсессĕн çумăр ярăнать,
Çунатлă чун çÿлтен çĕре анать,
Чечек папки илемлĕн çурăлать,
Йĕркипелен юрри те юрланать.
Мехел çитсен.
